उपक्रम

वसतिगृहाच्या मेसचा उपयोग करून अक्षयपात्र संस्थेच्या सहयोगाने अन्नसेवा देण्याविषयी एकमत झाले. समितीचे कार्यकारी विश्वस्त तुकाराम गायकवाड यांनी अक्षयपात्र संस्थेच्या पदाधिकाऱ्यांना ही संकल्पना सांगितली. भारतभर अन्नसेवेत काम करणाऱ्या या संस्थेच्या पदाधिकाऱ्यांनी काही तांत्रिक बाबी समजून घेत त्याला तात्काळ मंजुरी दिली. रोज सकाळी आणि संध्याकाळी हे जेवण उपलब्ध होण्याची व्यवस्था पक्की झाली. गणेश काळे यांनी इच्छुकांची यादी तयार केली. मग व्हॉटस अप, फेसबुकच्या माध्यमातून माजी विद्यार्थ्याच्या वेगवेगळ्या ग्रुपवर ही माहिती पोचवली गेली. दुबईतील विजय कदम, पुण्यातील मनीषा गोसावी, राजेंद्र ततार, नंदकुमार पन्हाड, जिभाऊ शेवाळे, राजू इंगळे, निसार चौगुले हा गट कामाला लागला. स्वतः चा निधी जमा करत इतरांना आवाहन केले गेले. आणि आश्चर्य म्हणजे बारा तासांच्या आत तब्बल १०० माजी विद्यार्थ्यांनी प्रत्येकी २५०० रुपये मंडळाच्या खात्यावर जमा करत १० हजार भोजनांची सोय झाली. कार्यकारी विश्वस्त मंडळाचे अध्यक्ष, पदाधिकाऱ्यांनी या शंभरीचे कौतुक केले. सर्वांच्या एकीचा आणि समाधानाचा हा अलौकिक क्षण नोंदला गेला.